یئنی قاپې Yeni Qapı یئنی قاپې، یئنی باخېش دېر تۆرک دۆنیاسېنا
إسکی‌شهیر خاطیره‌لری (۱) / علی چاغلا (شعر)
ایندی من، گؤڲده چَتیری آچېلمایان پاراشۆتچۆیم.
گؤڲدن گؤڲ گؤزلرینه دۆشۆرَم ایندی من
گؤزلرینه تاپشېر منی، بۏغماسېنلار
اۆزمک باجارمېرام.
سَنین گؤزلرین دَنیز،
منیم دردلریم دَنیز.
سَنین گؤزلرین پېنار،
منیم اۆره‌ڲیم یانار.
ایندی من سَنین دَنیز گؤزلرینده بیر کاپیتانام
نهنگ‌لر مۆحاصیره إدیبلر أطرافېمې.
دَلینیر، دئشیلیر دردلریمین ایچینده اۏلان گؤزلرین کیمی،
سو ایله دۏلور گمیم
منه بیر أل آت بو گمینی لیمانا چاتدېراق
إی تانرې‌نېن دلّالې، إی منیم نوح عمیم!..
من سنین’له ایکی بارداق لئیلا شرابې ایچمک ایسته‌ییردیم جوبا باردا
بار‌لار سۏکاغېنا بۏمبا قۏیوب پارتلاتدې دئعاش-لار .
پۏرسوک چایېندا فۏتۏ چکدیرمک ایسته‌ییردیم سنین’له
سئل گلیب آپاردې صمد آد‌لې دویقو‌لارېمې.
– إحئی، موسا بَڲ!..
چلیڲینی أمانت وئرَرسَن‌می؟
سئلین اۏرتاسېندا فۏتۏ چکدیرمک ایسته‌ییرم.
– چلیڲیم سینا داغېندا تانرې‌نېن گۆدازېنا گئتدی علی بَڲ، باغېشلا!..
سازۏوادا اولدوز‌لارېن اوچوشونو سئیر إتمک ایسته‌ییردیم سنین’له
گؤڲ‌لره دووار چکدیلر سیاسَت آدام‌لارې
اولدوز‌لارېن سا‌چې گؤرۆنۆر، نامحرَم دیرلـر دئیه.
ایندی إسکی‌شهیرین تراموای‌لارې ایچیمدن کئچیر
ایچیندن کئچیرَم تراموای‌لارېن ایندی من.
منیم ایچیمدن کئچیرسن تراموایدا سن
سنه آلدېغېم کیتابې اۏخویارکن.
من بۏغولمادېم دَنیز گؤزلۆم،
منی تئررۏر إده بیلمه‌دیلر، کۏمۏنیست باخېشلېم،
دووار‌لارې اۆستۆمه اؤرته بیلمه‌دیلر أفندیم،
من یئنه ده اؤلمه‌دیم،
یئنه ده وارام،
سَنین دَنیز گؤزلرینه شعر یازېرام تبریزدن.
سَنین گؤزلرین دَنیز،
منیم دردلریم دَنیز.
سَنین گؤزلرین پېنار،
منیم اۆره‌ڲیم یانار…
