یئنه آللاه آغلاییر / نادر الهی
یئردن گؤگـه داش اوچور
گؤگ‌دن یئره قوش یاغیر
یئنه آللاه آغلاییر
دئییرلر یاغیش یاغیر
بولاق‌لار گؤز یاشیندی
بولودلار آهین آللاه!
نه آدام‌سیز قالیب‌سان
نه‌دیر گۆناهین آللاه!
سئوگی آیاق‌لار آلت‌دا
نیفرت آت بئلین‌ده‌دی
سنین ألین‌دن چیخیب
دۆنیا ایت ألین‌ده‌دی
هارداسا یئنه بیر قوش
بیر چیچک گۆل‌له‌لنیر
بیر آج اوشاق جان وئریر
بیر آج گلین دیله نیر
بو دونیا پاکا چیخمیر
هئی یاغیش یاغا-یاغا
قینامیرام آی آللاه
حاققین وار آغلاماغا
اوتورموشام ایلاهی
باخیرام فاغیر-فاغیر
هله اووۆنماییبسان
هله ده یاغیش یاغیر…
“نادر الهی”
