أن بؤیۆک آرزې / سحر خیاوی (شعر)

أن بؤیۆک آرزې / سحر خیاوی (شعر)

بیر پایېز آخشامې حَیَطده ایدیک

تؤکۆردۆ آغاج‌لار خېنالې ساچېن

نئچه گۆن قالېردې چیلله آی گیره

سۏن باهار چاتېردې داها یۆک-یاپېن

سۏروشدو آن‌سېزېن سۏن‌بئشیک قېزېم:

-آناجان أن بؤیۆک آرزېنېز نه‌دیر؟!

فیکیرلی باخېردېم کیچیک قېزېما

بئینیمده آرزې‌لار قاطارې گئدیر

صف چکیب آرزې‌لار بئیین رفیمده

هر بیری اؤزۆنۆ اۆستۆن بیلیردی

یالان دۆنیامېزدا آدام‌لار کیمی

اۏ بونو، بو اۏنو صفدن سیلیردی

دئدیم: گؤزل قېزېم أن بؤیۆک آرزېم

اۆچ أتجه‌بالامېن سعادتی دیر

گۆلۆب نارین-نارین دئدی: هن آنا

بۆتۆن آنالارېن بو نییتی دیر

-بیر ده کی آرزېم وار تۏیوزو گؤرَ‌م

اۏغول إولندیریب گلین گتیرم

سۏنرا دا أجلدن آمانېم اۏلسا

کؤرپه‌جه-کؤرپه‌جه نوه‌می گؤرَ‌م

-آی آنا یازدېغېن سؤزجۆک‌لر نئجه؟!

بیلیرم نه‌قَدَر جانېن دېر اۏنلار

بیر عؤمۆر سوندوغون اۏ أمک‌لرین

آرزې‌لار ایچینده بس سانانمېرلار؟!

-کیتاب اؤز گۆلۆم دیر، قلم سئوگیلیم

اۏنلار’لا خۏش آن‌لار کئچیرتدیم قېزېم

دۆنیانېن أن تاملې شربت‌لرینی

اۏنلار’لا روحوما ایچیرتدیم قېزېم

اۏینادېم سؤزجۆک’له بیر عؤمۆر بۏیو

یامان لذّتی وار سؤز یاراتماغېن

سنی لال ایسته‌ین تۏپلوما رغمن

اؤزۆنۆ یازماغېن، سس اوجالتماغېن

آخشام‌لار یاتاندا آتان، قارداشېن

من، سۆکوت، بیر ده آی یۏلداش اۏلوردوق

اۏ قریب اۏتاقدا یالقېزلېغېمدا

صۆبحه‌جن اۏنلار’لا سېرداش اۏلوردوق

فلسفی دردیمی هئچ ساغالتمادې

نه کیتاب اۏخوماق، نه زَهَرپام‌لار

کیم دئییر بیله‌نین دردی آرتمادې؟!

یاشام دوستاق اۏلدو بۆتۆن آخشام‌لار

اۏخودوم یۆکلَندی سېرتېما دۆنیا

بۆتۆن اینسان‌لارېن داشېدېم غمین

چۏخ بیلن چۏخ چکر، آتالار دئییب

بونا اینان گۆلۆم، بونا اۏل أمین

اؤپۆردۆم قلمی کیتاب‌لارېمې

دفتریم گؤزۆمۆن یاشېن سیلیردی

دئییردیم سېر سؤزۆم قولاق‌لارېنا

قلم آنلایېردې، کیتاب بیلیردی

 بیلیرم روحومون عۆصیانلې آتې

من‌سیز ده هر زامان کۆلَکده چاپار

اۏنلارا آرزېم یۏخ، سؤزۆم سؤز اۏلسا

آخېب اۆرَک‌لرده یۏلونو تاپار