قېرمېزې فینجان / سارای محمد‌رضایی (حیکایه)
صندلی‌یه سؤیکه‌نیب، آیاق‌لارینی میزه ایلیشدیریر. ألینی فینجانین اوستونده ساخلاییر. ساعاتا باخیر، یئددی اوتوزدؤرد دقیقه. هاوا گئتگئده قارانلیق‌لاشیر. شکیلی پنجره‌نین شیشه‌‌سینه دوشور. اؤزونه باخیب، بارماق‌لاری ایلا ساچ‌لارینی داراییر. ائله بیل آی‌لار دیر سو اوزو گؤرمه‌ییب دیر. اوتاغین هاواسی سَرینلَش‌سین دئیه پنجره‌نی بیر آز آچیر. کوچه باشینداکی دوکانچی بیغ‌لارینی ائشه ائشه، اوجا بوی آغ‌کؤینک‌لی بیر اوغلانی دانیشیغا توتوبـدور. بیر آز اویان‌لیغا، دیک‌دابان باشماغینا گؤره چتین‌لیک’له تئز-تئز یئرییـَن بیر قادینا باخیر. قادینین دیک‌دابان باشماغی‌نین سَسی، ساعاتین تیک‌تاکی کیمی قولاغیندا تاققیلداییر. قادین بالاجا قیزینا نـه’سه دئییب، اونون بالاجا أل‌لریندن یاپیشیر. قیز ساغ ألی ایله قولچاغینی قوجاقلاییب، قاچا قاچا آناسی‌نین آددیم‌لاری ایلا آیاق‌لاشیر.
ائو قارانلیغین ایچینده باتیر. دیوارلارا دوشـَن ایشیق‌لار’لا یاناشی، حـَزین بیر موزیک سَسی ده ائشیدیلیر. اؤزونو یاتاغا آتیب، اوزونون بیر یانینی بالیش‌دا گیزلـه‌دیر. دالی اوسته اوزانیب آیاغینی آیاغی‌نین اوستونـه قویور. اوسته‌کی آیاغینی ریتمیک حرکت’له اوینادیر. یئنه ده موبایلینی ألینـه گؤتورور. جاواب‌سیز زنگ‌لری‌نین سایی ألینـدن چیخیب دیر.
ـ «ألوو! ألوو! سَن‌سـَن عـ…!»
ـ «خئییر! ایشتیباه توتوب‌سوز خانیم!»، بالاجا بیر قیز سَسی تئلئفونـدان چیخیر.
ـ «سَن کیم‌سَن؟!!»
ـ «دئدیم کی، ایشتیباه توتوب‌سوز خانیم!»
موبایلی، میزین اوستونه قویوب، آیاغا قالخیر. قارا دؤشلویونون بَندلری قول‌لاریندان آسلانیر. قیسا دونونـدا، آغ بالیق‌لار اوزه-اوزه قارا بیر دنیزده ایتیرلر.
أل‌لرینی مطبخده‌کی سیماوَرین بوخاری‌نـا توتوب قیزیشیر. همیشه اوندا چای ایچدیگی قیرمیزی فینجانی گؤتورور. سیماوَر باشینداکی چای‌نیک‌دن چای سوزوب، فینجانی بارماق‌لاری آراسینا آلاراق، دوداق‌لارینا یاپیشدیریر. ایچینده حیسس ائتدیگی بوزلاغی أریتمه‌گـه چالیشیر. یانیلماسا، صوبح‌دن ایندی‌یـه کیمی اوچ چای‌نیک چای دَمـه قویوبـدور. خیابانداکی بیغی بورما دوکانچی، یئکه بیر زنجیر’له دوکانی‌نین حیصارینی چکیب قیفیللاییر. ماشین‌لارین پنجره‌یـه، دیوارلارا دوشـَن ایشیق‌لاری دال‌بادال گؤزونون قاباغیندان سوووشور. موزیک دئهشت‌لی آن‌لاری یادینـا سالیر. صندلی‌ده أگلـه‌شیب، یاریمچیلیق فینجانی اوزونه یاپیشدیریر. موبایل‌دا ائشیتدیگی بالاجا قیزین سَسی هلـه ده قولاغیندا دیر. فینجان‌دان قالخان بوخارین اوزونه دَیدیگینی حیس ائدیر. اؤز اؤزونه ـ «بیر فینجان دا ایچسـَم، داها آرتیق قیزیشارام»، دئییر.
ـ «قاسیم عمی! زحمت اولماسا بیر شیشه “کوکاکولا” ایستیردیم!»
ـ «گئجیکمیسن عمی جان! ائوه گئتمک واختی دیر.»
سارای محمد‌رضایی
سارای خانم اللریز آغریماسین گوزل حکایه اوخودوم.